བསྟོད་པ་དོན་དང་ལྡན་པའི་གཏམ།

ནམ་མཁའི་དབྱིངས་ནས་སྦྲང་ཆར་ཟིལ་མ་དང་།
ཕྲ་ཚོམ་མེ་ཏོག་འཛིན་མའི་ལྟོ་བ་རུ།
བག་ཡོད་དགེ་བཅུའི་ཁྲིམས་ཀྱིས་སྐྱེས་པོ་དུ་ལ།
སྣོད་བཅུད་འདི་འདྲ་བློ་ཡི་གཡོ་བ་ཙམ།
ཨ་ལ་ལ།
ཨེ་མ་ཧོ།
བདེ་ཞིང་སྐྱིད་པ་ལ།
ཚ་གྲང་ལས་ཀྱང་ཐུ་བའི་གདུང་བ་སྟེ།
ཆགས་སྡང་དུ་ཁ་གཉིས་ལས་སྐྱོབས་བྱེད་པ།
བྱམས་དང་བཟོད་པའི་གྲིབ་བསིལ་འཁྱིལ་བ་ཅན།
རིན་ཆེན་གདུགས་ཀྱི་བྱ་བ་གཞན་ན་གང་།
ཨ་ལ་ལ།
ཨེ་མ་ཧོ།
བདེ་ཞིང་སྐྱིད་པ་ལ།
ལྷུང་ལྷུང་འབབ་པའི་མཆོད་ཡོན་བདུད་རྩིའི་ངོགས།
ཡང་ཡང་འཁྱུག་པའི་གསེར་ཉ་ཉམས་དགའ་བཞིན།
གཡོ་མེད་ཏིང་འཛིན་ཟབ་མོའི་རྣལ་འབྱོར་ངང་།
མཐའ་བྲལ་ཡངས་པའི་བློ་གྲོས་འབྱམས་སུ་ཀླས།
ཨ་ལ་ལ།
ཨེ་མ་ཧོ།
བདེ་ཞིང་སྐྱིད་པ་ལ།
སྐབས་གསུམ་པས་ཀྱང་གཙུག་ཏུ་ལེགས་བཀུར་པའི།
འཆི་མེད་བདུད་རྩིས་བཀངས་པའི་བུམ་པ་འདིས།
དུས་མིན་འཆི་དང་ནད་ཀྱི་འཇིགས་པ་ལས།
འགྲོ་བ་ཀུན་ལ་སྐྱོབ་པའི་ངལ་གསོ་སྦྱིན།
ཨ་ལ་ལ།
ཨེ་མ་ཧོ།
བདེ་ཞིང་སྐྱིད་པ་ལ།
བཅོ་ལྔའི་དུང་ཟླ་ནམ་མཁའི་དབྱིངས་ན་རྫོགས།
པད་མའི་འཛུམ་ཞལ་མཚོ་དང་རྫིང་ན་ངོམས།
རྐང་དྲུག་བུང་བ་སྦྲང་རྩིས་ཚིམ་པ་ཡི།
ཆོ་ག་འདི་ནི་འཇིག་རྟེན་བྱེད་པོས་བྲིས།
ཨ་ལ་ལ།
ཨེ་མ་ཧོ།
བདེ་ཞིང་སྐྱིད་པ་ལ།
རིས་མེད་འགྲོ་རྣམས་མངོན་མཐོ་ངེས་ལེགས་སར།
རིམ་པར་འཁྲིད་པའི་ཆོས་ཕུང་བརྒྱད་ཁྲིའི་གསུང་།
མགྲིན་པ་ཆོས་ཀྱི་དུང་སྒྲ་བཞད་པ་ན།
འཇིག་རྟེན་ཁམས་སུ་མུན་སེལ་སྒྲོན་མེ་སྦྱིན།
ཨ་ལ་ལ།
ཨེ་མ་ཧོ།
བདེ་ཞིང་སྐྱིད་པ་ལ།
རྟེན་འབྱུང་སྟོང་བའི་དོན་དུ་འཆར་བ་དང་།
སྟོང་བ་རྟེན་འབྱུང་གྲོགས་སུ་འཆར་བའི་གཟུགས།
དཔལ་གྱི་བེའུར་འཆར་བའི་རི་མོ་འདིས།
ཆོས་ཉིས་བདེན་པས་འགྲོ་ཀུན་དགེ་གྱུར་ཅིག
ཨ་ལ་ལ།
ཨེ་མ་ཧོ།
བདེ་ཞིང་སྐྱིད་པ་ལ།
བདེན་པ་གཉིས་དང་བཞི་ཡི་གཞུང་ཤིང་རྩེར།
བསླབ་པ་གསུམ་གྱི་ཤམ་བུ་སུམ་ལྟེབ་ཅན།
རྣམ་པར་རྒྱལ་བའི་མཚན་མས་མཛེས་པ་འདི།
སྲིད་པའི་རྩེ་མོར་བསྒྲེང་བ་ཨ་མཆོག་དགོན།
ཨ་ལ་ལ།
ཨེ་མ་ཧོ།
བདེ་ཞིང་སྐྱིད་པ་ལ།
ཚུལ་ཁྲིམས་གཙང་མའི་གཞི་ཡི་ལྟེ་བ་དང་།
ཏིང་ངེ་འཛིན་གྱི་མུ་འཁྱུད་རིམ་པར་མཛེས།
འབར་བའི་ཤེས་ར་བ་འཁོར་ལོ་རྩིབས་སྟོང་ཅན།
ཆོས་ཀྱི་ཞིང་ཁམས་ཨ་མཆོག་མཚན་ཉིད་དགོན།
ཨ་ལ་ལ།
ཨེ་མ་ཧོ།
བདེ་ཞིང་སྐྱིད་པ་ལ།
ཨ་ལ་ལ།
ཨེ་མ་ཧོ།
བདེ་ཞིང་སྐྱིད་པ་ལ།