བྱམས་པ།

གནས་མཆོག་ཁ་བ་དཀར་པོ།
བུ་ཆུང་ང་ཡི་ཕ་ཡུལ།
ཉམ་ཆུང་མི་ཡུལ་འགྲིམ་དུས།
ཕ་ཡུལ་ཡིད་ལ་འཁོར་བྱུང་།
ཁ་བ་དཀར་པོའི་ཡུལ་ལ།
ཆུང་འདྲིས་བྱམས་པ་ལུས་སོང་།
བྱམས་པ་དྲན་པའི་གླུ་འདི།
མི་ཡུལ་ཕྱོགས་ནས་བཏང་ཡིན།
ང་ཡི་ལས་འགྲོའི་བུམ་པར།
ཚིགས་མེད་སྨྱུག་མ་སྐྱེས་བྱུང་།
བརྩེ་གདུང་ལྡན་པའི་བུ་མོ།
སྨྱུག་མའི་ནང་ནས་མཇལ་བྱུང་།
སྐྱེ་ས་ལྷ་ལུང་དཀར་པོ།
མི་ལ་སྨོན་དགོས་མེད་དེ།
བསྐོས་ས་བདུད་ལུང་ནག་པོ།
ཚེ་སྔོན་ལས་ལ་བསྐོས་སོང་།
བསོད་ནམས་མེད་པའི་བུ་ངས།
ཆུང་འདྲིས་བྱམས་པ་དྲན་བྱུང་།