ནེའུ་ཆུང་རྒྱང་གླུ།

གླུ་ཚིག ༸ཆོས་རྗེ་འཇིགས་མེད་ཕུན་ཚོགས།
གླུ་མ། སྐྱིད་བྱམས།

ནུབ་སྤྲིན་དཀར་མདུན་དུ་འཇའ་ཚོན་ཤར།།
ཤར་ཉི་འོད་གསལ་བའི་རྐྱེན་ལས་བྱུང་།།
ཞིང་འབྲུ་དྲུག་སྨིན་པའི་སྔ་ལྟས་རེད།།
འདི་རྟེན་འབྲེལ་མ་བསྒྲིགས་རང་འགྲིགས་ལགས།།

བུ་དད་ལྡན་རྒྱུད་ལ་ཉམས་རྟོགས་འབར།།
གོང་བླ་མའི་ཐུགས་རྗེའི་རྐྱེན་ལས་བྱུང་།།
ཆོས་བཤད་སྒྲུབ་དར་བའི་སྔ་ལྟས་རེད།།
འདི་རྟེན་འབྲེལ་མ་བསྒྲིགས་རང་འགྲིགས་ལགས།།

གནས་གསེར་ལྗོངས་ཡུལ་དུ་བདེ་སྐྱིད་ཤར།།
གླིང་དཔའ་བོའི་ཐུགས་རྗེའི་རྐྱེན་ལས་བྱུང་།།
བདུད་ནག་ཕྱོགས་འཇོམས་པའི་སྔ་ལྟས་རེད།།
འདི་རྟེན་འབྲེལ་མ་བསྒྲིགས་རང་འགྲིགས་ལགས།།

བརྡ་གོ་འམ་ཚེ་རབས་སྙིང་གི་གྲོགས།།
སེམས་སྤྲོ་མོ་འདུག་གམ་ཁྲོམ་ཚོགས་ཚོ།།